• رمضان كرونـا .. في البيت ..!
- من منظر الزهــرة بجنب الهــلالِ
عنَّت على الخاطر شجون وتباريح !
- يـالله يزيـن الفـعـل والا المـقـالِ
مهما يكون الوقت هم ونواطيح !
- بعض الهواجس غايبات التوالي
لكنها تصرع قلوب المجاريـح !
- وبعض المرض كايـد وفرقىٰ العيالِ
مالـه دوا..غير الدعـٰا.. والتسابيح !
- والقلب من كثر الجوىٰ صار بالي
وين الغـلا ؟! ومزيِّنين التماريح ..؟!
- مـرام يابهـجـة سكـون الليالي ..
وعزيز يا ناي الفرح والتواشيح !
- غابت شقاوتكم وغـاب الدلالِ ..
والبيت من شوقه لكم قرَّب يسيح !
- يحكي عن اشواقي قصيد الليالي
شوق المصلِّي للجُمَـعْ والتراويح !
- وان ابطوا الغالين يا ويل حالي ..
بلـوة ( كـرونا ) حوَّلتها تصاريح !
-امسيت انا في راس مجلس لحالي
انظم هواجيـسٍ تطايـرْ مع الريـح !
-حتى( ابو يـاســر ) تـركني لـحالي
و( ابواصيل ) يقول ماشي مراويح !
-يالله تفـرِّجـهـا وتحــكم ســؤالي ..
تمحق كرونا بماحِقَةْ صرصر الريح !
ابو معــاذ - القصبة
١٧ - رمضان ١٤٤١هـ
ليست هناك تعليقات:
إرسال تعليق